2017年10月7日

「我去旅行,攝影工具只有一部ASUS Zenfone 4!」問題係:夠唔夠?

暑假過後,手機界吹風已久嘅年度「性價王」ASUS Zenfone 4終於登場!距離2016年上一代嘅產品,華碩應該儲起不少用家comments,例如Facebook一出post,一定有幾個花生友留言「有NFC先講啦!」(其實乜NFC真係咁重要?!)「人地出到雙鏡喇喎!」(呢樣又係真,但單一鏡頭嘅ZF3性價表現,真係高,我仲用緊!),2017年9月最新出街嘅ZF4,究竟有幾多係回應花生友,有幾多係真正feel到嘅進步,希望呢篇可以提供少少端倪!

機背後的雙鏡頭
我手上的Zenfone 4係該系列中最基本嘅版本Zenfone 4 (S630/4GB/64GB),
另有ZenFone 4 ZE554KL (S660/6GB/64GB),分別在於2款不同效能嘅處理器 Qualcomm Snapdragon 660 或 630。價錢方面,S630版本控制在港幣3000樓下,賣$2998,S660版本建議售價為$3798。

5.5吋屏幕2.1mm窄邊框,為1920 x 1080 Full HD規格,加上市面比較少見的薄荷綠色,評語係:清爽!另有比較穩陣嘅黑同白色應市,適合保守嘅你。先來幾張寫真:
採用Type C USB及3.5mm耳機插頭
手機右側有開關及volume key
前置鏡頭所在,注意,前置是一顆鏡頭,另一粒黑點係對焦用
最近如果有留意地鐵或巴士車身,都不難發現ZenFone4的廣告,加上系列代言人韓國oppa孔劉的投資,相信華碩對於今年的旗幟系列充滿信心!Zenfone 4主打手機攝影,身為長期使用之前兩個型號 (Zenfone 3 及 Zenfone3Zoom)的用家,我對ZF4的攝影質素滿有信心的,但同時我會比其他人對ZF4更有要求。今次以 We Love Photo為口號,帶來不算新奇的雙鏡頭,打算看看sample相的朋友,文章大部分的相片都盡量以原圖原size上載,有死link的話,請通知!


「我去旅行,攝影工具只有一部ASUS Zenfone 4!」問題係:夠唔夠?

上個月,我去咗日本廣島玩幾日,只打算食食玩玩,老老實實,以ZF4雙鏡頭再加一向有不錯表現的攝力,我覺得以規格來說,夠有突!細心留意,相機功能及版面,對比前作ZF3及Zenfone3zoom都有頗大的更改。先講硬件和數字。

ZenFone 4雙鏡頭均設於機背,主鏡頭為Sony旗艦級的IMX362感光元件,擁有 F1.8 大光圈,0.03秒相位對焦,最大輸出4032 x 3024px (等於1200萬像素),83度攝影視角。
機背的副鏡頭賣點為120度攝影視角,光圈細一點,但都有F2.2;最大輸出3264 x 2448 px (即800萬像素)。
前置鏡頭沒有廣角功能,但維持有84度視角,F2.0大光圈及最大輸出3264 x 2448 px (即800萬像素)。拍心口講,交足功課!


給「唔知咩叫廣角鏡嘅你」

對「光圈快門焦距」有少少認識嘅朋友可能唔需要再睇,即刻睇下面嘅sample相,如果唔太清楚的話,請畀少少時間我,以ZF4嘅相機介面講解一下,如何好好運用廣角功能。

第一步:打開相機app

 第二步:見唔見到白色圓形拍攝按鈕嘅左手邊有「三座山 / 一座山」嘅選擇?就係呢度。「一座山」係標準鏡,「三座山」就係廣角鏡。



第三步:就係咁簡單!一click就可以選擇將更多的人或物攝入鏡頭。同標準鏡一樣,只要你長按對焦的位置,就會出現一個圓圈,可以調校光暗程度,連EV都不用學,光暗自己校。

有圖有真相之同一角度同一距離嘅相:

標準鏡


廣角鏡

「120度視角」有幾「廣」?相信應該有基本嘅概念。

下一部分,我會展示上個旅程中,利用標準和廣角的實際比較,有關的拍攝參數亦有列出方便網友們參考。



日本廣島之旅相片樣辦

1. 對日本的印象,可能係來自窗外亂中彷似有序嘅電線。想拍出「好似有好多條電線」嘅效果,試下「120度視角」!

(上) 主鏡頭 (下)廣角鏡頭
2. 室外要影相,想將多種景物攝入畫面,你都仲可以行後兩步,但室內的話,唔通拆牆咩~ 呢一點亦係ZF4 標準/廣角嘅主要賣點。去旅行,一入到酒店民宿房,就影相,示範係今次廣島住嘅民宿:

(上) 主鏡頭 (下)廣角鏡頭


(上) 主鏡頭 (下)廣角鏡頭
3. 室內用廣角鏡頭拍攝嘅優點,大家明白了;到室外,又如何呢?答案係增加「迫力」,令你有種「嘩!好壯闊呀」呢個反應!以下有兩個例子,拍攝地點係距離廣島1.5小時巴士車程嘅尾島。


(上) 主鏡頭 (下)廣角鏡頭
以低角度廣角抇攝尾道嘅步道,創造不一樣嘅視角和營造迫力
4. 以廣角鏡拍攝遠景,即所謂嘅「大景」,亦有效將近似panorama嘅相片內容帶到手機攝影普遍嘅比例,如16:9 或 4:3。
走上尾道千光寺公園嘅觀景台,拍攝中距離山上嘅美術館,以及遠景港灣景色,再配上瀨戶內海的小島背景,畫面有層次之餘又通透。

(上) 主鏡頭 (下)廣角鏡頭

真。改善空間

手上嘅 Zenfone 4 (S630) 版本係來自ASUS公關朋友,是否代表我要隱惡揚善?Sorry~ 作為ASUS嘅用家,我都希望佢地不斷進步。其實由Zenfone3到 Zenfone3Zoom,再到Zenfone 4,攝影方面每一個新型號都係有「可見」嘅改善,先講實測一個月及只帶ZF4去旅行影相後,感覺到嘅改變。

1. 對焦快
廠方資料聲稱全球手機對焦最快,只需0.03秒,即使移動中之物件都有自動鎖定的對焦功能。其實我唔識去計0.03秒,但對焦快而準,的確係感受到。用auto拍攝功能,基本上已經萬無一失,而我發覺近攝對焦也非常出色,對於去食飯時「相機行先」嘅人,ZF4可謂最佳發揮場合。等我畀個例子 ...

拍攝場地:我屋企 ... 仲有幾件不同大小及距離嘅物件。我會簡單示範只需一按屏幕上想對焦嘅物件,以及出來嘅景深效果。

第一張,上圖,焦點:背景巴黎鐵塔。
可見前景都有散景效果 (即係「濛咗」!)

第二張,上圖,焦點:Alsace白鸛擺設,亦都係普遍影食物嘅情況,前景清,後面濛。

難度最高係第三及第四張,左面嘅雪山擺設 同 Kelvin公仔,其實水平距離差唔多,但如果你細仔睇,放大來「聞」,第三張,亦即上圖,雪山擺設係焦點。下圖,Kelvin公仔就係focus喇!


2. 相機介面
介面是另一項好容易察覺嘅改善,上一代,我想如果將「自拍計時器」放到相機介面,自拍時就可以馬上選擇2秒、5秒、10秒延時自拍。ZF4,就有喇~ 就放在左邊嘅部分。
不過有個隨之而來嘅問題,就係右邊嘅功能button太多 (又有少少偏大),所以如果想「一按即對焦」功能的話,有時會有所妨礙。
右邊的暗灰部分,好似太大喇!
如果要「一按即對焦」功能的話,有時會有所妨礙。
輪到「真‧改善空間」,最大問題係前置鏡頭。
最初去旅行用前置鏡頭自拍時,我覺得非常好,而且覺得顏色調校得很有風格,非常適合人像,之後回香港自拍時,覺得成日濛,究竟點解?
大概係因為預設光度要求太光,令到在戶外有充足光線嘅環境下表現得優異,但換轉室內 (即我返咗香港,成日去餐廳食嘢自拍),光線不足之下,會容易鬆郁濛。雖然曝光補償 (EV)可以非常容易調校 (只需長按,就會出現圓形,再可拉高拉低控制光暗),但我覺得如果手機識得自動感光,再自動控制「安全快門」的話,將會更好!

第二,說好的RAW呢?!
我試過用jpg放電腦,用Lightroom執相,係絕對夠空間後制,但眾所周知,RAW係皇者。
相信之後嘅updates,將會回應。以下係一張用jpg執嘅相,網友大可下載原圖,細意品嚐,jpg格式後制是否可取。


拍攝地:日本尾道千光寺
光圈:f/1.8  快門:1/3000 sec  ISO: 26 (即auto) 白平衡:自動
(邊張係before,邊張係after,不用多講啦!)

BTW, 仲有一個重要新功能未試,就係NFC做 Android Pay。既然之前個個都話「冇NFC就唔買」,就睇下是否咁好用!
旅攝方面,其實仲可以再講多少少,就先停一停,到我去完格魯吉亞返來再寫!

鳴謝:
感謝ASUS提供的雙鏡頭ZenFone 4
ASUS Mobile Facebook香港官方專頁

沒有留言:

發佈留言