廣東話旅行 Podcast
自 2018 年無再做網上旅遊節目後，呢一兩年都有以前嘅我唔認識嘅聽眾問我幾時再開咪，好想聽深度嘅旅遊分享，老實，其實幾開心幾感動，原來花咗 9 年時間，真係有少少回響；最近一次，再有人喺 IG 回我 Story，話佢喺外國，好想聽下用廣東話嘅旅遊節目，於是我介紹咗林輝個 podcast《一百萬零一種旅行》 同之前我都好鍾意聽嘅阿翔同 Sonya 主持嘅《人類適宜飛行》podcast，出於客氣，佢都有叫我再開咪啦，今次我回答係：有 partner 同我一齊主持都可以考慮。
過去幾年，好多嘢都變晒，包括旅行嘅心態。過咗幾年喇，我覺得可以以現時嘅心態去再做旅行嘅 talk show，加上我都有聽 podcast，廣東話節目唔多，有深度嘅旅遊節目更加冇乜，如果有人肯同我一齊 partner 去做，都可以考慮呀。
上電台講旅行
朋友圈子關係，我同 RTHK 嘅普通話台同一台嘅關係會好啲，以前都成日上呢兩個台做嘉賓，上到呢兩個台，不約而同地有搵我做定期嘅主持，不過最終係第一次係我婉拒咗，第二次係因為2019年之後，香港電台作為黨台，對節目內容及主持或參與人士都有不同程度嘅審查，我就係埋門時失去呢個機會，不過我又冇咩所謂，一來個環節之後都被取消，一來又唔係有錢收（冇錢收，多人聽都 okay，不過個節目唔係）。而邀請我嘅朋友係喺兩年後同我講返當時突然話取消環節嘅原因，我代表非常理解，新香港嘛，要做留下來的人，就一定有犧牲，咁我又知朋友亦打算離開香港，謀更好嘅發展。唔捨得，但都開心嘅。
