今篇用了香港口語寫，台灣 / 星馬的朋友，不好意思喇！
我知呀~ 妳聽日有新歌新 MV 《Cadigans》嘛，好平常啫，妳成日突然間出首專輯之外嘅歌啦，但係當我詳細睇內容，原來係同日推出新單曲、新MV，同 ... 新專輯！What？！「Lover 時代」已經告一段落？！一年咋喎！呢個女人，好痴線！
一個「時代」嘅終結，總有一種失落感覺，似話你知「你又老咗」。美國流行歌手嚟講，Taylor Swift 算多產，第一隻大碟現身於 2006 年，通常隔一年就推出新碟，十幾年喇，由美國鄉謠 American Country、流行鄉謠 Country Pop，到無懸念嘅流行曲曲風，我算係由美國鄉謠中段開始聽，同好多十幾歲妹妹仔一樣，好鐘意佢寫嘅歌詞，你當我係一個阿叔用音樂做回春藥啦！無論真情定假意，我同啲妹妹仔一樣，都鐘意佢為歌迷所做嘅準備；雖然有啲位好似好計算，但又好似好真咁，呢種心態，我諗係 fans 先會明，而我發覺好多時都同 Swifties 都差唔多嘅 sense，講咁多，都係想講我同啲妹妹仔 connect 到啫。
十幾歲出道，一成年就走入成人世界嘅名利圈、頒獎台，拿下「年度最佳專輯」等等大獎。努力寫歌，廿幾歲人，就已經實現咗好多歌手嘅夢想，亦開始關注音樂事業以外嘅議題，2018 年終打破政治立場嘅沉默，喺當年美國中期選舉中，表態支持所屬州份田納西州嘅兩位民主黨候選人。喺紀錄片《Miss Americana》裡面，更令人見到，當時呢個二十幾歲嘅偶像對於政治取態與表態嘅掙扎與阻力。有睇過呢部紀錄片嘅人（我估計只有 fans 先會睇），都應該會記得有一幕，可謂完全演繹返你舊年仲會同啲「藍家人」討論 / 爭辯嘅情境。我好欣賞佢嘅音樂才華同智慧，而家嘅年青人真係好多叻仔叻女，回想我 30 歲嘅時候，一定冇而家年青人咁認識社會。喺呢部紀錄片中，最重要嘅訊息就係無論你係咩崗位，都應該運用你嘅影響力，去為自己所相信嘅價值努力。喺 Taylor Swift 嘅例子，甚至係美國 country music 界（唔講流行樂壇，係因為 country music 嘅受眾更保守、更右翼 ... 或者可理解為「藍」更傳神），即使有好多人警告過，你可能會落得 Dixie Chicks（哈！我又有聽！）嘅下場，但佢都堅持發聲，因為發聲係對抗強權同作出改變嘅重要一步（喺 Taylor 嘅 case 嚟講，係唱片公司 Big Machine、新唱片公司 Universal、各大音樂串流供應商等等）！喺中華人民共和國香港特別行政區，有位老不死話要放棄兩代年青人，Taylor Swift 喺《Only the Young》就咁樣回應：
They aren't gonna change this
We gotta do it ourselves
They think that it's over
But it's just begun
You were outnumbered, this time
... Only the young, Only the young can run, so run, and run
2019 年強勢推出嘅《Lover》，其實我並冇特別鐘意，其中一個原因，我諗係隻碟嘅整體風格幾 colorful、幾開心，但作為香港人，2019 年有乜嘢值得開心丫？！2020 年 7 月23 號嘅夜晚，知道呢個女人突然會喺十幾個鐘之後出新 full length album，而個唱片係 in the woods 嘅灰暗同未知，好有鄉謠感覺，好有《Safe & Sound》個感覺，直覺我會好鐘意！
Taylor 喺 IG 上咁樣講：（大概意思）今年夏天，我所有計畫都沒有在預期中執行，但有一件不在計畫中的事，就是發行第八張專輯 ... （最鐘意一部分嚟喇）我哋身處嘅呢個時間，冇嘢係肯定，直覺同勇氣話我知，如果你做緊一件你熱愛嘅事，你就要將佢實現！
呢番說話，勁有感。Taylor Swift 音樂上好多嘢都好有計劃，簡單如今年出碟，基本上上年就要做巡迴演唱會，以呢個女人為例，佢都算多搞作，耐唔屎就有啲新計劃，以維持人氣，但今年令佢明白，人生有好多嘢都計畫唔到。我諗呢一年對香港人嚟講實在沉重，對整個世界嚟講，疫症就好似一下當一頭捧喝，有好多事你係計畫唔到，做啦！盡做啦！
"There are still good things in 2020 "
沒有留言:
發佈留言