極權解慰疫苗，你今日打咗未？ 我喺烏茲別克一個鬼地方

極權解慰疫苗，你今日打咗未？我喺烏茲別克一個鬼地方

[香港廣東話版本，如有台灣朋友想讀書面語版本，請留個言，會有書面語版本，感謝]

3 年前 4 月嘅一個下午，去到烏茲別克境內一個自治國 Republic of Karakalpakstan，佢同烏茲別克嘅關係係：可以通過公投脫離烏茲別克，但烏國又擁有否決權，係怪㗎。首府 Nukus 有種鬼城嘅感覺，日間空氣中嘅沙塵令到整個地方都灰灰黃黃，夜間更似電影《Silent Hill》場景。去 Nukus，大部分旅客都係為咗轉車去已經死咗嘅 Aral Sea 鹹海，但呢個城市仲有另一亮點：一間可能係中亞嘅羅浮宮！

呢間正名叫 Nukus Museum of Art 嘅藝術館，最出名係佢擁有全世界第二豐富嘅俄羅斯前衛藝術（Russian Avant-garde）嘅藏品，藏量僅次於聖彼得堡嘅俄羅斯博物館 State Russian Museum。「中亞的羅浮宮 Louvre of Central Asia」係英國衛報 The Guardian 起嘅朵，我睇過篇文，亦去過呢兩家藝術館，呢個名純粹係標題黨而已。

藝術，作為一個族群嘅意志表現同現實反映，極權政府當然會視之為洪水猛獸，現實喎，人話喎，個個畫家啲作品都係人民生活困苦，咪同政權所宣傳嘅「共產黨真偉大」有啲出入？！一定要取締兼打壓啦！上世紀 30 年代，蘇共獨裁頭目史達林（又譯：斯大林）將前衛藝術，同其他冇得到蘇共政權認同嘅藝術運動或流派都通通標籤為「Degenerate art 頹廢藝術 」，一切唔跟老大哥嗰一套就只有一個下場：打壓、批鬥同殲滅。

喺 30 至 60 年代期間，有位叫 Igor Savitsky 嘅畫家 / 考古學家，眼見呢場由共產極權引發嘅藝術災難，於是盡咗佢最大能耐，喺呢個「鳥不生蛋，狗不拉屎」嘅 Nukus，拯救並收藏咗上萬件備受威脅嘅藝術品，包括畫、印刷及雕塑。到咗斯大林喺 1953 年死咗，打壓相對放鬆後，佢向 Karakalpak 政府爭取建立藝術館，於是呢間藝術館最早就喺 1966 年成立。好事多磨，之後缺錢缺資源、蘇聯解體、烏茲別克獨立等事件都令到藝術館無法正常運作。而家呢個樣，其實係 2000 年先建成。

當極權來臨，藝術與新聞（當然點止 ...）同樣遭受前所未有嘅破壞，你有盡做你本份保存歷史嗎？你 backup 咗未？

旅行，從來都唔止吃喝玩樂，原來仲係一種「極權解慰疫苗」，親身去歷史嘅場景，即使面對荒謬日常，你都可以話：N 年前，XX 都係咁。不過佢喺 Y 年後就倒台。就係咁喇，你今日打咗未？ 

走入 Nukus 一個民房區遇到嘅小朋友

寫多兩句：

- Nukus Museum of Art 仲有其他名，例如 Savitsky Museum and the Desert of Forbidden Art，就係紀念返 Igor Savitsky

- 可以影相嘅入場門票貴過普通冇得影相幾倍，所以館內冇乜影相

延伸閱讀：

《心活誌》2018年9月：烏茲別克大市集 體驗好客民族

主力【烏茲別克】少量【哈薩克】的短篇結集