2011年3月22日

紀居2 - 裝修之前 ... 講講揀屋苑和水電

上回本想由收樓後的階段開始講裝修,但一提到樓宇的質素如何影響收樓後的裝修,就覺得必須一提,睇樓的階段時要留意的地方:水電。

「水、電」係最麻煩的。
買舊樓,水電可以搞到好麻煩。睇樓時候,你要問經紀:

1. 大廈有無做過大型維修? 幾時完成? 做過什麼項目?
大廈的大型維修通常每10年左右才進行,我新居的屋苑則在落成20年後才做維修。(題外話,註:睇樓時如果經紀跟你說「大廈未做維修,但立案法團已正商討,放心啦」,那你就可放心去懷疑啦!因為由開始傾,到達成共識開始工程,時間可能長達10年,沙田市中心某些屋苑正是此情況,尤其炒家多的屋苑。) 維修項目可以包括外牆翻新、換公用食水喉、翻新電梯大堂等。

2. 最緊要係 ... 水喉。水是我~ 生命之源!(記唔記得周慧敏N年前的廣告歌??哈哈!)
認識小弟就知道我給新居的食水問題搞到好困擾,因為我當初給經紀誤導了,他說大廈在4年前維修時已換喉;事實上,大廈公用部分的確更換了,業主私人部分則完全「未掂過」,經驗所得,你睇樓時更要問清楚 ...
大廈公契 (Deed of Mutual Covenant, DMC)所訂,屬於小業主的水喉部分由哪裡開始、水錶在哪、喉的走位如何??

以我單位為例,我在大裝修中已換了喉,但之後發覺水仍很黃,到我入伙後再向管理處及我的cfu查證,才發現我換的不是全部喉。Why? 等我解釋一下,公契所訂單位水錶之前屬於公家,水錶之後則屬小業主,4年前維修已換了水錶前的一段,水錶位於大廈的3樓平台,水喉直上單位樓層,轉個彎打橫在單位外,最後轉入單位中的廚、廁。cfu說,我換的是單位外打橫的一條;管理處說,由3樓平台至新居樓層垂直的一段則廿多年來完全「未掂過」,亦發現有生鏽位,所以我新居的水就很黃了。即是說,現時的解決方法是搭一個棚,由3樓至單位樓層,將整條食水喉換掉。

收樓時的一條入屋生鏽食水喉。之後已換 ... 以為從此有清水 ...

至於水喉的走位,更重要!要在睇樓階段時向有關人士查詢 (註:不實陳述為違法行為)。按我的情況,要考慮的是錢,因為屋苑的喉全在屋外走;但如果食水喉是經居住樓層的石屎地入同層的水錶的話,那就大件事,非付錢就能解決,因為要換的話,就要徵求所有受影響的單位業主同意才能動工,談何容易。舊樓就是有這些問題。

3. 會否有任何的喉或間隔是不准改動??
新裝修,總有很多大計,令蚊居變得更實用更有空間感,有些人會將廚房變開放式,有些甚至把廚廁的位置對調。後者影響來去水喉,必須事先確定是否可行 (我對上2層的朋友就是有此改動)。除此之外,哪道牆為主力牆當然要問啦!

電力方面,我就不大了解,因為我除了知道配合電熱水爐的三相電外 (而我亦沒有用,新居是用煤氣的),其他配備基本全由我cfu決定。零碎的ideas有:

1. 平時聽其他人問「電制一個幾錢?」(聽講係判斷一個裝修工程平定貴的其中一個因素) 通常一個大約都收$500-700不等,原來講的是「一個新造的電制」,而原有的要轉位置,只會酙量收費。

2. 轉大制位置原來好貴 (過萬),無必要盡量保留原位不轉。

3. 最好一早按功能及傢私擺位plan定所有電制位及數目,因為後加會好麻煩或有礙觀瞻;又或開了蘇位又無用,就浪費金錢。例如有版友說已在新設計的雜物柜中預留一直立式的吸塵機,但他又無預計到他想要的款式需要充電,否則應在柜背板開窿裝socket。

4. 不要睇少電制版面的駛費,新居用的是斯耐德 (即前Clipsal) E8000系列,原來每個不同function的面版可由$40至$120,有得十來二十個,你都咪話唔肉痛。小弟不喜E3000的剃LED燈,蚊居太細,而面版的LED太光了,不合適;還好,E3000比E8000貴!

5. 水喉電線要鑿牆,可看出cfu細心與否 ... 做得好的話,cfu會先「界」兩條線,用以鑿牆時「不過界」,求其的話,就會是但鑽開,咁做,對道牆都唔好啦!
屋內已換澳洲包膠銅喉。藏喉的凹位是界好再鑿的。

6. 最好在鋪好線之後,影張相,記低所有電線及喉管的走位,以防之後鑽牆鑿地時,鑽中喉管。

暫時所想係咁多,再想到會再加。讀者們、準業主們,請留意喇~~

4 則留言:

  1. 我的新居也剛開始裝修, 我暫時都無想過換喉(約15年樓齡). 工作很忙, 沒有時間去forum搵料, 有什麼注意要你提點了. 另外, 你知否那裡有東南亞feel的傢俱呢, 去了海怡, 大部份是中式, 替我留意留意, thanks

    回覆刪除
  2. Shadow, 真係?! 恭喜啊!新居係邊呀?? 唔好話咩提點啦,交流下 ...
    你話東南亞傢俱,我第一時間都係唸海怡,但其實用earth tone現代設計的傢俱,或材質是柚木,再配東南亞decoration,已經能夠營造到。
    我有朋友有個天台,整得好靚,有小草披、有jacuzzi、有沐浴間,他在網上訂了一張泰國feel木bench,以為只係幾百蚊,點知turn out連其他收費,埋單要3倍幾價錢!真正東南亞,都幾「那利」!
    我經過太子洗衣街同前一條街,記得有3間賣類似夜冷的舖頭,都有類似東南亞feel的傢俱。
    碰碰運氣啦!

    回覆刪除
  3. Shadow, 我醒起,o係沙田Home Square有間賣竹製傢俱的,可以一試!

    回覆刪除
  4. 只是搬去一街之隔,都是馬鞍山. 現在的簡約風不是我杯茶, 我鍾意好warm,有點東南亞度假feel的屋企.

    回覆刪除